Aktivitet e Ministrisë

Ministrja Bajrami mori pjesë në lansimin e platformës "Fuqizimi Ekonomik i Gruas-Udhëzuesi për Biznese"

Prishtinë, 07/02/2017

Ministrja e Tregtisë dhe Industrisë, Hykmete Bajrami, mori pjesë në lansimin e platformës “Fuqizimi Ekonomik i Gruas-Udhëzuesi për Biznese”, platformë kjo elektronike e zhvilluar për listimin e bizneseve kosovare që janë në pronësi ose në bashkëpronësi të grave.

Në fjalën e saj, ministrja Bajrami tha se lansimi i kësaj platforme do të jetë shumë i dobishmëm për të gjitha gratë që janë në biznes. "Përmes kësaj platforme besoj që gratë afariste do të jenë shumë më të informuara për zhvillimet ekonomike dhe mundësitë për afarizëm, dhe besoj që sot posedimi i informatës në kohë është një nga resurset më të rëndësishme për afaristet,” theksoi ajo, dhe shtoi se platforma gjithashtu mundëson edhe rrjetëzim të bizneseve që është poashtu mundësi shumë e mirë për këtë komunitet të rëndësishëm afaristesh. 

Më tej, ministrja Bajrami nënvizoi se fuqizimi ekonomik i gruas është pjesë e agjendës ekonomike të kësaj Qeverie dhe se deri tani janë ndërmarrë një sërë veprimesh për përmirësimin e ambientit të biznesit në përgjithësi, gjë e cila ka ndikuar edhe tek gratë ndërmarrëse. “Është rritur numri i grave ndërmarrëse dhe po besojmë që ky është rezultat i përmirësimit të politikave që ne i kemi ndërmarrë”, tha ministrja Bajrami.

Ministrja po ashtu theksoi se në Ministrinë e Tregtisë dhe Industrisë deri më tani janë të regjistruara 8317 biznese të cilat janë në pronësi ose në bashkëpronësi të grave. “Gratë ndërmarrëse janë partnere të rëndësishme në zhvillimin e sektorit privat dhe zhvillimin  ekonomik  të vendit", tha ministrja, duke theksuar përkushtimin e MTI-së që agjenda nacionale e gruas të inkorporohet në strategjinë për zhvillimin  e sektorit privat.